مولانا سید کلبِ جواد پر حملہ ملتِ جعفریہ پر وار ہے، مجلسِ علماء ہند (قم) کا سخت ردعمل
11
M.U.H
17/10/2025
مجلسِ علماء ہند شعبہ قم کے صدر حجۃالاسلام مولانا سید احمد رضا رضوی زرارہ لکھنؤ میں حجۃ الاسلام و المسلمین مولانا سید کلبِ جواد نقوی پر ہونے والے حملے کی سخت الفاظ میں مذمت کرتے ہوئے اسے بزدلانہ اور ملتِ جعفریہ پر حملہ قرار دیا ہے۔
جاری کردہ مذمتی بیان میں صدر مجلس علماء ہند شعبہ قم نے کہا کہ مولانا سید کلبِ جواد نقوی پر حملہ نہ صرف ایک ممتاز عالمِ دین کی ذات پر حملہ ہے بلکہ پوری ملتِ جعفریہ اور اہلِ حق کی آواز کو دبانے کی ناپاک کوشش ہے۔
انہوں بیان میں مزید کہا کہ مولانا کلبِ جواد نقوی کی ملت کے اتحاد، سماجی انصاف اور وقف املاک کے تحفظ کے لیے طویل خدمات کسی تعارف کی محتاج نہیں۔ ان پر حملہ دراصل حق و انصاف کی آواز کو خاموش کرنے کی کوشش ہے جسے ہرگز برداشت نہیں کیا جا سکتا۔
حجۃ الاسلام و المسلمین مولانا سید احمد رضا رضوی زرارہ نے حکومتِ ہند اور متعلقہ اداروں سے پرزور مطالبہ کیا ہے کہ واقعے کی شفاف اور غیر جانب دارانہ تحقیقات کرائی جائے اور ملوث عناصر کو قانون کے مطابق قرارِ واقعی سزا دی جائے تاکہ مستقبل میں کوئی اس طرح کے مذموم عزائم رکھنے کی جرأت نہ کر سکے۔
بیان کے آخر میں ملت کے تمام افراد سے اپیل کی گئی ہے کہ وہ صبر و تحمل سے کام لیتے ہوئے قانونی و پرامن طریقے سے احتجاج کریں اور اتحاد و یکجہتی کو ہر حال میں برقرار رکھیں۔
حجۃ الاسلام و المسلمین مولانا سید احمد رضا رضوی زرارہ نے حجۃالاسلام و المسلمین مولانا سید کلبِ جواد نقوی کی سلامتی و عافیت کے لیے دعا کرتے ہوئے کہا کہ اللہ تعالیٰ انہیں اپنی حفظ و امان میں رکھے اور حق و انصاف کے لئے شروع کئے گئے ان کے مشن کو کامیابی و استقامت عطا فرمائے۔
