[3؍ جمادی الثانی روزِ شہادتِ بضعۃ المصطفیٰﷺ، حضرت فاطمہ زہرا سلام اللہ علیہا پر اپنا نوحہ]
۔۔۔۔
یہ تخیّل کی مہکتی ہوئی سر سبز زمیں
اِس پہ گُل ہائے عقیدت کی مہک ہے بی بی
زاویے فکر کے دیکھوں تو نظر آتا ہے
ترے الطاف کی خوش رنگ دھنک ہے بی بی
اس بلندی پہ کھڑا ہوں تری مدحت کے طفیل
مرا ہمراہِ سفر سارا فلک ہے بی بی
خود سُنے میں نے ملائک سے قصیدے تیرے
گونج لفظوں کی مرے عرش تلک ہے بی بی
۔۔۔۔
ترا در ہے کہ درِ عرش؟ کوئی کیا سمجھے
اس پہ جھکتی ہے ضمیرِ بشریت کی جبیں
ذہنِ انساں میں سمٹتی نہیں عظمت اس کی
تھی سراپا ادب اس در پہ رسالت کی جبیں
تھک کے جب گردشِ ایام سے لوٹ آتی تھی
چین پاتی تھی یہاں آ کے امامت کی جبیں
اسی چوکھٹ پہ جھکا شبر و شبیر کا سر
سربسجدہ ہے اسی در پہ شہادت کی جبیں
۔۔۔۔
ہاں، اسی در کو جلایا تھا مسلمانوں نے
کس قدر تلخ تھا منظر در و دیوار کے بیچ
’’ہائے بابا!‘‘ کی صدا صحنِ علیؑ سے اٹھی
آ گئیں بنتِ پیمبرؐ در و دیوار کے بیچ
جیسے شعلوں سے اُلجھتا ہوا قرآن کوئی
جیسے ہو سورۂ کوثر در و دیوار کے بیچ
ہاتھ پہلو پہ رکھا اور پکاریں زہراؑ
”مر گئی میں، مرے حیدر! در و دیوار کے بیچ“
۔۔۔۔
چشمِ تاریخ میں محفوظ ہیں سارے لمحے
جب دلِ سیدِ کونینؐ پہ دروازہ گرا
جگرِ حیدرِ کرّارؑ جلا شعلوں میں
مادرِ زینبؑ و حسنینؑ پہ دروازہ گرا
کانپ اٹھے دونوں جہاں ظلم کے اس تیور سے
صرف زہراؑ نہیں، دارین پہ دروازہ گرا
لفظ روتے ہیں، قلم چیخ اٹھا ہے ، ثاقبؔ!
مرے نوحے، مرے ہر بَین پہ دروازہ گرا
0
0
