’تم ایک جنگجو سے بھی بدتر ہو‘: اسد الدین اویسی پہلگام حملے پر پاکستان پر برہم
36
M.U.H
28/04/2025
جموں و کشمیر کے اننت ناگ ضلع کے پہلگام قصبے کی بیسران وادی میں 22 اپریل کو سیاحوں پر ہوئے دہشت گردانہ حملے کو لے کر پورے ملک میں غم و غصہ کا ماحول ہے۔ ملک کے عوام دہشت گردوں اور پاکستان کے خلاف سخت کارروائی کا مطالبہ کر رہے ہیں۔ ادھر لوک سبھا کے رکن پارلیمنٹ اور اے آئی ایم آئی ایم کے سربراہ اسد الدین اویسی نے پاکستان پر سخت تنقید کی ہے۔
اے آئی ایم آئی ایم کے سربراہ اسدالدین اویسی نے ایک تقریب سے خطاب کرتے ہوئے کہا کہ پاکستان جو کہتا رہتا ہے کہ اس کے پاس ایٹمی بم ہیں یاد رکھیں کہ وہ کسی بھی ملک میں جائے اور بے گناہوں کو مارے تو کوئی ملک خاموش نہیں رہے گا۔ اس سے کوئی فرق نہیں پڑتا ہے کہ ملک میں حکومت کس کی ہے۔"
انہوں نے کہا کہ "جو لوگ اس طرح ہماری ہندوستانی سرزمین پر آتے ہیں اور کسی کو اس کا مذہب پوچھنے کے بعد گولی مار دیتے ہیں، تم کس مذہب کی بات کر رہے ہو؟ تم ایک جنگجو سے بھی بدتر ہو، تمہارا یہ عمل ثابت کرتا ہے کہ تم داعش کے نظریے پر آگے بڑھ رہے ہو"۔
اسد الدین اویسی نے لوگوں سے خطاب کرتے ہوئے کہا کہ جب کشمیر ہمارے ملک کا اٹوٹ انگ ہے تو کشمیر میں رہنے والا ہر کشمیری بھی ہمارا اٹوٹ انگ ہے، ہم کبھی کشمیریوں کے خلاف نہیں ہیں، ہم ان پر شک کیسے کر سکتے ہیں۔
انہوں نے مزید کہا کہ "کیا آپ اس کشمیری نوجوان کو جانتے ہیں جس نے دہشت گردوں سے ہتھیار چھینتے ہوئے اپنی جان گنوائی؟ کیا آپ اس کشمیری کو جانتے ہیں جو حملے کے بعد زخمیوں کو اپنے کندھوں پر اٹھا کر پہاڑی سے 40 منٹ تک پیدل چلتا رہا؟ اسی دوران ایک اور کشمیری تھا جو ایک معصوم بچے کی جان بچا رہا تھا، تو ایسی صورتحال میں ہم ان پر کیسے شک کرسکتے ہیں؟"
