کیدارناتھ میں ہیلی کاپٹر حادثہ، 7 لوگوں کی موت، ریسکیو آپریشن جاری
18
M.U.H
15/06/2025
اتراکھنڈ کے کیدارناتھ میں اتوار کی صبح ایک ہیلی کاپٹر حادثے کا شکار ہو گیا۔ گپت کاشی سے کیدار ناتھ دھام کے لیے اُڑان بھرنے والا آرین ایوی ایشن کا ہیلی کاپٹر گوری کنڈ-سون پریاگ کے جنگلوں میں گر کر تباہ ہو گیا۔ اس حادثے میں 7 لوگوں کے مارے جانے کی خبر ہے۔ حادثے کی اطلاع ملتے ہی ریسکیو ٹیم موقع کے لیے روانہ ہو گئی۔
’اے بی پی‘ کی خبر کے مطابق یہ حادثہ موسم خراب ہونے کی وجہ سے پیش آیا۔ ہیلی کاپٹر میں 7 لوگ سوار تھے جن میں 7 کی موت ہو گئی جس میں ایک بچہ بھی شامل ہے۔ حادثہ اونچائی پر ہونے کی وجہ سے ریسکیو ٹیم کو موقع پر پہنچنے میں کافی تاخیر ہوئی۔ بتایا جاتا ہے کہ ہیلی کاپٹر میں صلاحیت سے زیادہ افراد سوار تھے۔
اتراکھنڈ اے ڈی جی لاء اینڈ آرڈر ڈاکٹر وی مروگیشن نے بتایا کہ گوری کنڈ میں لاپتہ ہوا ہیلی کاپٹر حادثے کا شکار ہو گیا۔ اطلاع کے مطابق صبح 5 بج کر 17 منٹ پر آرین کمپنی کے ذریعہ ہیلی کاپٹر میں 6 عقیدت مندوں کو لے کر کیدار ناتھ ہیلی پیڈ سے گپت کاشی ہیلی پیڈ کے لیے ٹیک آف کیا گیا۔ راستے میں موسم خراب ہونے کی وجہ سے ہیلی کاپٹرک ے ذریعہ دیگر مقام پر ہارڈ لینڈنگ سے ہیلی کاپٹر تباہ ہو گیا۔
موصولہ اطلاع کے مطابق ہیلی کاپٹر میں سوار لوگوں میں راج ویر (پائلٹ)، وکرم راوت بی کے ٹی سی باشندہ راسی اُکھی مٹھ، ونود، ترشٹی سنگھ، راج کمار، شردھا، راشی کے نام شامل ہیں۔
ہیلی کاپٹر حادثے پر اتراکھنڈ سول ایوی ایشن ڈیولپمنٹ اتھاریٹی (یو سی اے ڈی اے) نے ایک بیان جاری کرکے کہا، ’’ٓآج صبح قریب 5:20 بجے شری کیدارناتھ دھام سے گپت کاشی جا رہا ایک ہیلی کاپٹر گوری کنڈ کے پاس حادثہ ہونے کی اطلاع ملی ہے۔ ہیلی کاپٹر میں پائلٹ سمیت 7 مسافر سوار تھے۔ ہیلی کاپٹر میں سوار مسافر اتراکھنڈ، اتر پردیش، مہاراشٹر اور گجرات کے ہیں۔‘‘
اس حادثے پر اتراکھنڈ کے وزیر اعلیٰ پشکر سنگھ دھامی نے گہرے صدمے کا اظہار کیا ہے۔ انہوں نے کہا کہ جنپد رودر پریاگ سے ہیلی کاپٹر حادثہ ہونے کی انتہائی افسوسناک خبر آئی ہے۔ ایس ڈی آر ایف، مقامی انتظامیہ اور دیگر ریسکیو دستہ راحت اور بچاؤ کاموں میں لگا ہے۔
