’آپریشن سندور‘ کا اویسی نے کیا خیرمقدم، کہا- ’پاکستان کو ایسا سبق سکھانا چاہیے کہ دوسرا پہلگام نہ ہو‘
26
M.U.H
07/05/2025
پہلگام حملے کا جواب دیتے ہوئے ہندوستانی فوج نے پاکستان کے 9 دہشت گردانہ ٹھکانوں پر فضائی حملے کیے۔ ہندوستان کی طرف سے کی گئی اس جوابی کارروائی کو ’آپریشن سندور‘ کا نام دیا گیا ہے۔ اس کارروائی پر آل انڈیا مجلس اتحاد المسلمین (اے آئی ایم آئی ایم) سربراہ اسد الدین اویسی کا بیان سامنے آیا ہے۔
اسد الدین اویسی نے ہندوستان کے اس قدم کی ستائش کی ہے۔ اویسی نے اپنے پوسٹ میں لکھا، ’’میں ہماری دفاعی افواج کی جانب سے پاکستان میں دہشت گرد ٹھکانوں پر کیے گئے ہدفی حملوں کا خیرمقدم کرتا ہوں۔ پاکستانی ڈیپ اسٹیٹ کو ایسا سبق سکھانا چاہیے کہ پھر کبھی دوسرا پہلگام نہ ہو۔ پاکستان کے دہشت گردی کے ڈھانچے کو پوری طرح سے تباہ کر دینا چاہیے۔ جئے ہند‘‘۔
دوسری طرف ہندوستان کی اس کارروائی کے بعد ملک اور بیرون ملک کے کئی رہنماؤں کا ردعمل سامنے آیا ہے۔ بہار کے سابق نائب وزیر اعلیٰ اور آر جے ڈی رہنما تیجسوی یادو نے بھی اس پر اپنی بات کہی ہے۔ انہوں نے کہا، جئے ہند، بھارت ماتا کی جئے۔ نہ دہشت گردی رہے نہ علیحدگی پسندی۔ ہمیں اپنے بہادر جوانوں اور ہندوستانی فوج پر فخر ہے۔
شیو سینا (یو بی ٹی) رہنما پرینکا چترویدی نے بھی ہندوستانی فوج کی کارروائی پر خوشی ظاہر کی ہے۔ انہوں نے کہا کہ دہشت گردوں نے پہلگام میں مذہب پوچھ کر مارا تھا۔ اب کرم بھگتو۔ چترویدی نے ’ایکس‘ پوسٹ میں آگے لکھا، ہر ماتھے کا سندور مٹنے نہ دیں گے، مٹایا تو اس کا جواب دے کر رہیں گے۔ جئے جوان! جئے ہندوستان! جئے ہند!
واضح رہے کہ پہلگام دہشت گردانہ حملے کے بعد، ہندوستان نے دہشت گردی کے خلاف اپنی پالیسی کو مزید جارحانہ بناتے ہوئے صبح ڈیڑھ بجے 'آپریشن سندور' کیا۔ اس خفیہ آپریشن کے تحت ہندوستانی فضائیہ نے پاکستان اور پاکستان کے زیر قبضہ کشمیر (پی او کے) میں واقع دہشت گردوں کے کئی ٹھکانوں پر حملے کرکے اسے تباہ کر دیا۔ اس حملے میں کئی دہشت گرد ہلاک بھی ہوئے۔
