پاکستان کے لیے جاسوسی کے الزام میں یوپی کا تاجر گرفتار
15
M.U.H
19/05/2025
اتر پردیش کے رام پور میں ایک تاجر کو پاکستان کے لیے جاسوسی کرنے کے الزام میں گرفتار کیا گیا ہے۔ یہ اطلاع پولیس نے اتوار کے روز دی۔ ملزم کی شناخت شہزاد کے طور پر ہوئی ہے۔ اتر پردیش پولیس کی اسپیشل ٹاسک فورس (ایس ٹی ایف) نے اسے مرادآباد سے گرفتار کیا۔ شہزاد پر پاکستان کی خفیہ ایجنسی آئی ایس آئی کے لیے سرحد پار اسمگلنگ اور جاسوسی سرگرمیوں میں ملوث ہونے کا شبہ ہے۔ یہ گرفتاری ہرِیانہ کی ایک یوٹیوبر کی گرفتاری کے کچھ ہی دن بعد ہوئی ہے، جسے اسی طرح کے الزامات میں پکڑا گیا تھا۔
رپورٹ کے مطابق، ایس ٹی ایف نے اپنے بیان میں کہا کہ شہزاد قومی سلامتی سے متعلق حساس معلومات بھی اپنے آقاؤں کو فراہم کر رہا تھا۔ تحقیقات میں یہ بھی سامنے آیا ہے کہ وہ ہندوستان میں آئی ایس آئی کے ایجنٹوں کو پیسہ اور ہندوستانی سم کارڈز مہیا کرتا تھا۔ ایس ٹی ایف کا دعویٰ ہے کہ وہ رام پور ضلع اور اتر پردیش کے دیگر علاقوں سے لوگوں کو آئی ایس آئی کے لیے کام کرنے پاکستان بھیجتا تھا۔ ان افراد کے ویزوں کا انتظام آئی ایس آئی کے ایجنٹوں کی طرف سے کیا جاتا تھا۔
پولیس نے کن دفعات کے تحت مقدمہ درج کیا؟
ان الزامات کی تصدیق کے بعد لکھنؤ کے اے ٹی ایس تھانے میں ہندوستانی قانون کی دفعات 148 اور 152 کے تحت مقدمہ درج کیا گیا ہے۔ شہزاد کو مرادآباد کی عدالت میں پیش کیا گیا اور فی الحال وہ پولیس ریمانڈ میں ہے، جبکہ قانونی کارروائی جاری ہے۔ یاد رہے کہ یہ گرفتاری ہرِیانہ کی یوٹیوبر جیوتی ملہوترا کی گرفتاری کے بعد عمل میں آئی ہے، جس پر دہلی میں پاکستان ہائی کمیشن کے ایک ملازم سے رابطہ رکھنے کا الزام ہے۔ اس نے اپنے یوٹیوب چینل "ٹریول وِد جو" پر پاکستان کے سفر سے متعلق متعدد ویڈیوز شیئر کی تھیں۔
پولیس کے مطابق جیوتی رانی کو ضلع حصار کے نیو اگروال ایکسٹینشن علاقے سے گرفتار کیا گیا۔ اس پر آفیشل سیکریٹس ایکٹ کی دفعات 3 اور 5، اور ہندوستانی قانون کی دفعہ 152 کے تحت مقدمہ درج کیا گیا ہے۔ ہفتے کے روز ایک عدالت نے اسے پانچ دن کی پولیس حراست میں بھیج دیا۔
