نئی دہلی: امریکہ-اسرائیل اور ایران کے درمیان جاری جنگ کو آر ایس ایس کے سربراہ موہن بھاگوت نے کچھ لوگوں کے ذاتی مفادات کا نتیجہ قرار دیا ہے۔ انہوں نے جمعہ کو ناگپور میں منعقد ایک پروگرام کے دوران کہا کہ دنیا کو لڑائی نہیں بلکہ باہمی میل جول اور امن کی ضرورت ہے۔
کسی بھی ملک کا نام لیے بغیر موہن بھاگوت نے کہا کہ دنیا اس وقت ڈگمگا رہی ہے اور خودغرضی کی وجہ سے جنگیں ہو رہی ہیں۔ انہوں نے کہا کہ سب کو ایسا محسوس ہو رہا ہے کہ دنیا آج تباہی کے دہانے پر کھڑی ہے۔ اپنے آباؤ اجداد کی وجہ سے صرف ہندوستان کے پاس وہ عنصر موجود ہے جو سب کو جوڑ سکتا ہے۔
باقی دنیا جنگل کے قانون پر چلتی ہے
انہوں نے کہا کہ ہندوستان انسانیت کے اصولوں کو اپناتا ہے، جبکہ کچھ دیگر ممالک اس سوچ پر یقین رکھتے ہیں کہ "جو سب سے طاقتور ہے وہی باقی رہے گا"۔ موہن بھاگوت نے کہا کہ ڈگمگاتی ہوئی دنیا کو دوبارہ دھرم کی بنیاد پر متوازن کرنا ہمارا کام ہے۔ یہ ہمیں خدا کی طرف سے دیا گیا فرض ہے، اور جب ہم اسے بھول جاتے ہیں تو ہماری مادی گراوٹ شروع ہو جاتی ہے۔
