ٹیرف میں کمی پر وزیر اعظم نریندر مودی کا امریکی صدر ڈونالڈ ٹرمپ سے اظہارِ تشکر
16
M.U.H
03/02/2026
امریکی صدر ڈونالڈ ٹرمپ نے ہندوستان پر عائد تجارتی ٹیرف میں نمایاں کمی کا اعلان کرتے ہوئے اسے 25 فیصد سے گھٹا کر 18 فیصد کر دیا ہے۔ اس فیصلے کا خیر مقدم کرتے ہوئے وزیر اعظم نریندر مودی نے امریکی صدر سے اظہارِ تشکر کیا اور اسے ہندوستان-امریکہ شراکت داری کے لیے ایک مثبت اور دور رس قدم قرار دیا۔ یہ اعلان صدر ٹرمپ نے اپنے سوشل میڈیا پلیٹ فارم پر ایک بیان کے ذریعے کیا، جس کے بعد دونوں ملکوں کے درمیان سفارتی اور تجارتی حلقوں میں خاصی سرگرمی دیکھی گئی۔
وزیر اعظم نریندر مودی نے سوشل میڈیا پلیٹ فارم ایکس پر جاری اپنے پیغام میں کہا کہ امریکی صدر سے بات چیت انتہائی خوشگوار رہی۔ انہوں نے کہا کہ ’میڈ اِن انڈیا‘ مصنوعات پر ٹیرف میں کمی سے ہندوستانی صنعت، برآمدات اور روزگار کے مواقع کو تقویت ملے گی۔ وزیر اعظم نے کہا کہ ہندوستان کی 140 کروڑ آبادی کی جانب سے وہ اس فیصلے پر صدر ٹرمپ کے شکر گزار ہیں، کیونکہ اس سے دونوں معیشتوں کے درمیان تعاون کے نئے امکانات پیدا ہوں گے۔
وزیر اعظم مودی نے اس بات پر بھی زور دیا کہ جب دنیا کی دو بڑی معیشتیں اور سب سے بڑی جمہوریتیں باہمی تعاون کے ساتھ آگے بڑھتی ہیں تو اس کے ثمرات براہِ راست عوام تک پہنچتے ہیں۔ انہوں نے عالمی امن، استحکام اور خوشحالی کے لیے امریکی صدر کے کردار کو اہم قرار دیتے ہوئے کہا کہ ہندوستان امن کے لیے کی جانے والی کوششوں میں امریکہ کے ساتھ کھڑا ہے اور دونوں ممالک کی شراکت داری کو مزید مضبوط بنانے کا خواہاں ہے۔
اس پیش رفت سے قبل امریکی صدر اور وزیر اعظم کے درمیان فون پر بات چیت ہوئی، جس میں تجارت کے علاوہ عالمی امور پر بھی تبادلۂ خیال کیا گیا۔ بات چیت کے دوران روس۔یوکرین جنگ سمیت توانائی اور تیل کی خریداری جیسے معاملات بھی زیرِ بحث آئے۔ امریکی صدر نے دعویٰ کیا کہ دونوں ملکوں کے درمیان ایک وسیع تر تجارتی مفاہمت پر اتفاق ہوا ہے، جس کے تحت ٹیرف میں کمی کے ساتھ ساتھ غیر ٹیرف رکاوٹوں میں بھی پیش رفت ہوگی۔
