’ہم نے ٹریڈ کے ذریعہ لڑائی ختم کرائی‘، امریکی صدر ٹرمپ نے ہند-پاک جنگ بندی میں ثالثی کا پھر کیا دعویٰ
17
M.U.H
22/05/2025
امریکی صدر ڈونالڈ ٹرمپ نے ایک بار پھر دہرایا ہے کہ انہوں نے ہند-پاک کے درمیان جنگ بندی کرائی۔ 21 مئی کو انہوں نے کہا کہ ہم نے ’ٹریڈ‘ کے ذریعہ دونوں ملکوں کے درمیان لڑائی ختم کرائی۔ جنوبی افریقہ کے صدر سیرل رام فوسا کے ساتھ بات چیت کے دوران انہوں نے کہا کہ میں نے ان سے (دونوں ملکوں سے) کہا- ’’ہندوستان اور پاکستان دونوں کے ساتھ امریکہ بڑا سودا کر رہا ہے۔ آپ لوگ کیا کر رہے ہیں؟‘‘
ٹرمپ نے آگے کہا- ’’کسی کو آخری گولی چلانی تھی، لیکن حالات اور خراب ہوتے جا رہے تھے۔ ہم نے ان سے بات کی اور مجھے لگتا ہے کہ ہم نے اسے سلجھا لیا۔‘‘ ٹرمپ نے پاکستان کے کئی رہنماؤں کی تعریف بھی کی اور ہندوستان کے وزیر اعظم نریندر مودی کو اپنا دوست بتایا۔ اس پر جنوبی افریقہ کے صدر نے کہا، کامن فرینڈ، مودی ہمارے بھی دوست ہیں پھر ٹرمپ نے کہا، وہ (مودی) ایک عظیم شخص ہیں۔
واضح رہے کہ ہندوستان اور پاکستان کے درمیان 10 مئی کو جنگ بندی ہوئی تھی۔ ٹرمپ نے سوشل میڈیا پلیٹ فارم ’ایکس‘ پر سب سے پہلے اس کی اطلاع دی تھی۔ انہوں نے لکھا تھا- ’’امریکہ کی ثالثی میں ایک لمبی رات کی بات چیت کے بعد، مجھے یہ اعلان کرتے ہوئے خوشی ہو رہی ہے کہ ہندوستان اور پاکستان مکمل اور فوری طور پر جنگ بندی پر متفق ہو گئے ہیں۔ کامن سینس اور بہترین خفیہ جانکاری کا استعمال کرنے کے لیے دونوں ملکوں کو مبارکباد۔ اس معاملے پر توجہ دینے کے لیے آپ کا شکریہ۔‘‘
ڈونالڈ ٹرمپ بعد میں بھی کئی مرتبہ دعویٰ کرتے رہے کہ انہوں نے ہندوستان اور پاکستان کے درمیان کشیدگی کو سلجھانے میں مدد کی ہے۔ حالانکہ ایک مرتبہ 15 مئی کو انہوں نے کہا تھا کہ دونوں ملکوں کے درمیان ثالثی نہیں کرائی ہے بلکہ صرف مدد کی ہے۔ وہیں حکومت ہند نے پاکستان کے ساتھ جنگ بندی کو لے کر صدر ٹرمپ کے دعوؤں کی تردید کی ہے۔ 13 مئی کو وزارت خارجہ نے کہا تھا کہ ہندوستان کو جموں و کشمیر سے متعلق کسی بھی معاملے پر تیسرے فریق کی دخل اندازی منظور نہیں ہے۔
ہندوستان اور پاکستان کے درمیان پورا معاملہ 22 اپریل کو پہلگام میں دہشت گردانہ حملے کے بعد شروع ہوا تھا جب دونوں ملکوں کے درمیان کشیدگی اپنے عروج پر پہنچ گئی تھی۔ اس کے بعد ہندوستانی فوج نے پاکستان کو منھ توڑ جواب دیتے ہوئے اس کے دہشت گرد ٹھکانوں پر حملے کیے تھے جس میں کئی دہشت گرد مارے گئے تھے۔ پھر پاکستان کی طرف سے فائرنگ کرکے سرحد پر ہندوستانی شہریوں کو نشانہ بنایا گیا اور کئی ڈرون حملے بھی کئے گئے جسے ہندوستانی فوج نے ناکام بنا دیا۔ بالآخر 10 مئی کو دونوں ملکوں کے درمیان جنگ بندی عمل میں آئی۔
