اے ایم یو کیمپس میں ٹیچر ’دانش راؤ‘ کا گولی مار کر قتل، نقاب پوش حملہ آوروں کی اندھا دھند فائرنگ سے سنسنی
41
M.U.H
25/12/2025
علی گڑھ مسلم یونیورسٹی (اے ایم یو) ایک بار پھر سرخیوں میں ہے۔ اس بار نقاب پوش حملہ آوروں نے یونیورسٹی کے ایل بی کے ہائی اسکول کے ٹیچر دانش راؤ کو اندھا دھند فائرنگ کر کے بے دردی سے قتل کردیا۔ اے ایم یو کیمپس میں فائرنگ کی واردات نے اس عالمی شہرت یافتہ ادارے کی حفاظت پرایک بار پھرسوال کھڑے کر دیے ہیں۔ اس دوران علی گڑھ کے ایس ایس پی نے دعویٰ کیا ہے کہ ملزم جلد ہی سلاخوں کے پیچھے ہوں گے۔
یہ پورا معاملہ علی گڑھ کے سول لائنز علاقے میں واقع علی گڑھ مسلم یونیورسٹی کا ہے۔ تھانہ سول لائنز علاقے میں واقع کیمپس اس وقت سنسنی پھیل گئی جب نقاب پوش حملہ آوروں نے اے بی کے ہائی اسکول کے ٹیچر دانش راؤ پر اندھا دھند فائرنگ کردی۔ شدید زخمی حالت میں ٹیچر کو فوری طور پر جے این میڈیکل کالج میں داخل کرایا گیا، جہاں ڈاکٹروں نے انہیں مردہ قرار دے دیا۔
واقعہ کی اطلاع ملتے ہی علی گڑھ کے ایس ایس پی خود بھاری پولیس فورس اور اے ایم یو انتظامیہ کے ساتھ جائے وقوعہ پر پہنچے۔ پولیس نے علاقے کا محاصرہ کرکے اے ایم یو کیمپس کے سی سی ٹی وی فوٹیج کی جانچ شروع کردی ہے۔ وہیں حملہ آوروں کی تلاش جاری ہے اور واردات کے پیچھے کے محرکات کا پتہ لگایا جا رہا ہے۔
اس دوران سماجوادی پارٹی (ایس پی) کے لیڈر اجو اسحاق نے پورے واقعہ کی مذمت کرتے ہوئے حکومت کو نشانہ بنایا۔ ایس پی لیڈر نے کہا کہ یوپی حکومت میں زیرو ٹالرنس کی بات کہی جارہی ہے، وہیں دوسری طرف اساتذہ کو گولیوں کا نشانہ بنایا جا رہا ہے۔ ان کا کہنا ہے کہ ملزم کھلے عام قتل کر رہے ہیں اور زیرو ٹالرنس پالیسی زمین پر ناکام نظرآرہی ہے۔ ایس پی لیڈر نے ٹیچر کو قتل کرنے والے ملزمین کے خلاف سخت کارروائی کا مطالبہ کیا۔
وہیں علی گڑھ کے ایس ایس پی نیرج جادون نے کہا کہ ملزمین کی ابھی تک شناخت نہیں ہو سکی ہے۔ نامعلوم افراد کی تلاش کے لیے پولیس کی کئی ٹیمیں تشکیل دی گئی ہیں۔ ابھی لواحقین سے بات چیت کی جائے گی۔ پولیس نے تحقیقات شروع کر دی ہیں اور جلد ہی حملہ آوروں کو گرفتار کر لیا جائے گا۔
