منی پور میں ممنوعہ تنظیموں کے خلاف کریک ڈاؤن، 4 انتہا پسندوں سمیت 10 افراد گرفتار
43
M.U.H
09/07/2025
امپھال: منی پور میں سکیورٹی کارروائیوں کے دوران ریاستی پولیس اور دیگر فورسز نے ممنوعہ تنظیموں سے وابستگی، جبراً وصولی اور مجرمانہ سرگرمیوں میں ملوث 4 انتہا پسندوں سمیت کل 10 افراد کو گرفتار کیا ہے۔ پولیس کا کہنا ہے کہ یہ گرفتاریاں باغی تنظیموں کے نیٹ ورک کو توڑنے اور ریاست میں امن و امان برقرار رکھنے کی کوششوں کا حصہ ہیں۔
پولیس کے مطابق، ایک کارروائی کے دوران بشنوپور ضلع میں 9 جون کو بند کے موقع پر پولیس اہلکاروں پر حملے میں مبینہ طور پر ملوث آرام بائی ٹینگول گروپ سے وابستہ 6 افراد کو حراست میں لیا گیا۔ یہ گرفتاریاں امپھال ویسٹ اور بشنو پور اضلاع کے مختلف مقامات پر چھاپوں کے دوران عمل میں آئیں۔
ایک علیحدہ کارروائی میں ممنوعہ تنظیم کنگلی پک کمیونسٹ پارٹی (پیپلز وار گروپ) یعنی کے سی پی (پی ڈبلیو جی) سے تعلق رکھنے والے ایک سرگرم کارکن کو شمالی اے او سی کے کیکروپت علاقے سے گرفتار کیا گیا۔ پولیس کے مطابق، یہ شخص عوام، اینٹوں کے بھٹے چلانے والوں اور سرکاری ملازمین سے دھمکی دے کر رقم وصول کرتا تھا۔ گرفتاری کے دوران اس کے قبضے سے ایک موبائل فون اور کچھ نقد رقم برآمد ہوئی۔
اسی تنظیم کے ایک اور کیڈر کو بشنو پور کے مویرنگ اوکشونگ بنگ علاقے سے گرفتار کیا گیا۔ پولیس کے مطابق، ملزم نے ضلع تھوبل میں تعلیمی اداروں سے بڑی رقم جبراً وصول کی تھی۔ تلاشی کے دوران ایک موبائل فون اور آدھار کارڈ ضبط کیا گیا۔
خفیہ اطلاعات کی بنیاد پر جبراً وصولی کے ریکٹ پر کریک ڈاؤن کے سلسلے میں منی پور پولیس نے بشنو پور ضلع کے اتلو علاقے میں محاصرہ کرکے کے سی پی (پی ڈبلیو جی) کے مزید دو کارکنوں کو بھی گرفتار کیا۔ یہ دونوں نمبول علاقے میں تنظیم کے لیے فنڈز اکٹھا کرنے میں مصروف تھے۔ ان میں ایک خودساختہ سیکشن کمانڈر بھی شامل ہے جس کے بارے میں خیال ہے کہ وہ 15 سے زائد کیڈروں کی قیادت کر رہا تھا۔
پولیس کا کہنا ہے کہ گرفتار افراد سے تفتیش جاری ہے اور ان کے نیٹ ورک کے باقی ارکان کی تلاش کے لیے اقدامات کیے جا رہے ہیں۔ منی پور پولیس اور سکیورٹی ایجنسیوں نے اپنے اس عزم کا اعادہ کیا ہے کہ وہ ریاست میں امن قائم رکھنے کے لیے باغی اور مجرمانہ عناصر کے خلاف کارروائیاں جاری رکھیں گے۔
پولیس ترجمان کے مطابق، حالیہ گرفتاریاں ریاست میں سرگرم انتہا پسند گروہوں کے خلاف ایک اہم کامیابی ہیں اور اس سے غیرقانونی سرگرمیوں میں ملوث افراد کو سخت پیغام دیا گیا ہے۔
