ہند۔پاک کشیدگی کے درمیان بند کیے گئے 32 ہوائی اڈے کھولے گئے، شہریوں کے لیے پروازیں شروع
13
M.U.H
12/05/2025
ہندوستان اور پاکستان کے درمیان حالیہ کشیدگی کی وجہ سے بند کیے گئے 32 ہوائی اڈوں کو ایک بار پھر شہری اڑانوں کے لیے کھول دیا گیا ہے۔ ایئرپورٹس اتھاریٹی آف انڈیا (اے اے آئی) نے پیر کو ایک پریس ریلیز جاری کرکے یہ اطلاع دی۔ اے آئی آئی نے ان ہوائی اڈوں پر فوری اثر سے اڑان خدمات بحال کرنے کو لے کر باضابطہ اعلان کیا۔
واضح رہے کہ ہند-پاک کے درمیان فوجی ٹکراؤ کی وجہ سے 9 مئی سے 15 مئی تک کے لیے ملک کے شمالی اور مغربی حصوں میں واقع 32 ہوائی اڈوں، جن میں سری نگر اور امرتسر جیسے ہوائی اڈے شامل ہیں، سے شہری اُڑانوں کو عارضی طور پر معطل کر دیا گیا تھا۔ ایئر پورٹس اتھاریٹی اف انڈیا (اے اے آئی) اور دیگر ایوی ایشن اتھاریٹیز نے NOTAM (نوٹس ٹو ایئرمین) جاری کرکے ان ہوائی اڈوں کو عارضی طور سے بند کرنے کی اطلاع دی تھی۔ اب حالت میں بہتری کے اشارے ملنے کے بعد ان ہوائی اڈوں کو مرحلہ وار طریقے سے کھولنے کا عمل شروع کیا گیا ہے۔
ایئر پورٹس اتھاریٹی آف انڈیا کی نوٹس کے مطابق بند کیے گئے سبھی 32 ہوائی اڈوں پر اڑانے شروع ہو چکی ہیں۔ ان ہوائی اڈوں میں اودھم پور، امبالہ، امرتسر، اونتی پور، بھٹنڈا، بھج، بیکانیر، چنڈی گڑھ، ہلوارہ، ہنڈن، جموں اور جیسلمیر، جام نگر، جودھپور، کانڈلا، کانگڑا (گگّل)، کیشود، کشن گڑھ، کُلّو منالی (بھونتر) اور لیہہ شامل ہیں۔
اس کے علاوہ لدھیانہ، مُندرا، نلیا، پٹھان کوٹ، پٹیالہ، پوربندر، راجکوٹ (ہیراسر)، سرساوا، شملہ، سری نگر، تھوئس اور اُترلائی میں بھی شہری پروازیں شروع کر دی گئی ہیں۔
