انتخابی اصلاحات ہو یا کوئی اور مسئلہ، ہم پیچھے نہیں ہٹیں گے: کرن رجیجو
10
M.U.H
02/12/2025
پارلیمنٹ کے سرمائی اجلاس میں اپوزیشن مسلسل ایس آئی آر پر بحث کا مطالبہ کر رہی ہے۔ اب مرکزی حکومت بھی اس مسئلے پر رضامند نظر آ رہی ہے۔ سرمائی اجلاس کے دوسرے دن پارلیمانی امور کے وزیر کرن رجیجو نے لوک سبھا میں کہا کہ چاہے انتخابی اصلاحات ہوں یا کوئی اور مسئلہ، ہم پیچھے نہیں ہٹیں گے اور بحث کے لیے تیار ہیں۔ انہوں نے کہا کہ میں نے کچھ اہم اپوزیشن جماعتوں کے رہنماؤں کو بات چیت کے لیے بلایا ہے، ہم کوئی راستہ نکالیں گے۔
سرمائی اجلاس کے دوسرے دن بھی رکاوٹ جاری رہنے کے درمیان وزیر نے کہا کہ کل بھی ہم نے درخواست کی تھی، آج پھر کر رہا ہوں۔ ملک میں کئی مسائل ہیں، کسی مسئلے کو ہم چھوٹا نہیں سمجھتے۔ پارلیمنٹ قوانین کے مطابق چلتی ہے۔ ایک مسئلے کو اٹھا کر آپ باقی مسائل کو دبایا نہیں جا سکتا۔ اس ایوان میں کئی جماعتیں ہیں، ہر جماعت کی بات سننی چاہیے۔ چند جماعتیں مل کر پارلیمنٹ کو بند کر دیں گی، یہ مناسب نہیں ہے۔
انہوں نے مزید کہا کہ یہ جمہوریت ہے۔ انتخابات میں جیت اور ہار ہوتی ہے، میں بھی انتخاب ہارا ہوں، اور اٹل جی بھی ہارے تھے۔ لیکن ہار کی ناراضگی میں آپ پارلیمنٹ میں غصہ نہیں نکال سکتے۔ یہ درست نہیں ہے۔ رجیجو نے بہار اسمبلی انتخابات کے نتائج کا ضمنی طور پر حوالہ دیتے ہوئے کہا کہ ایسی حرکتیں کرنے کی وجہ سے آپ (اپوزیشن) عوام کا اعتماد کھو رہے ہیں۔ میں یقین دلاتا ہوں کہ چاہے انتخابی اصلاحات ہوں یا کوئی اور مسئلہ، ہم پیچھے نہیں ہٹیں گے۔ ملک کے کسی بھی مسئلے پر ہم بحث کے لیے تیار ہیں۔ میں نے کچھ اہم اپوزیشن رہنماؤں کو بلایا ہے۔ ہم بات چیت کر کے راستہ نکالیں گے۔ ہم سب کی بات سنیں گے، آپ کو بھی حکومت کی بات سننی چاہیے… اور بحث کے لیے تیار ہو جانا چاہیے۔
پرینکا گاندھی کا موقف
کانگریس کی رکن پارلیمنٹ پرینکا گاندھی نے ایکس پر ایک پوسٹ میں کہا کہ ایس آئی آر کے ذریعے 'ووٹ چوری' کی جا رہی ہے۔ انہوں نے کہا کہ نریندر مودی حکومت اور انتخابی کمیشن مل کر ایس آئی آر کے ذریعے 'ووٹ چوری' کر رہے ہیں۔ یہ ہمارے کروڑوں دلت، پسماندہ، قبائلی اور محروم بھائیوں اور بہنوں سے ووٹ کے حق کو چھیننے کی منظم کوشش ہے۔ جتنے بھی سوال اٹھ رہے ہیں، انتخابی کمیشن کسی سوال کا جواب نہیں دے رہا اور حکومت کھلے عام کمیشن کا دفاع کر رہی ہے۔ یہ جمہوریت اور آئین کو ختم کرنے اور آمریت قائم کرنے کی سازش ہے۔ ہم یہ ہرگز نہیں ہونے دیں گے۔
