ریزرویشن کے سوال پر پی ایم مودی تلملا گئے ہیں، وہ بدلے کا رویہ اختیار کر رہے: وزیر اعلیٰ ریونت ریڈی
62
M.U.H
02/05/2024
بی جے پی کے خلاف حملہ تیز کرتے ہوئے تلنگانہ کے وزیر اعلیٰ اور کانگریس لیڈر اے. ریونت ریڈی نے بدھ کے روز وزیر اعظم نریندر مودی اور مرکزی وزیر داخلہ امت شاہ پر سنگین الزام لگایا۔ انھوں نے کہا کہ وہ بھگوا پارٹی سے اس کی ریزرویشن ختم کرنے کی مبینہ سازش کو لے کر سوال کیا، اس لیے مودی-شاہ میرے خلاف بدلے والا رویہ اختیار کر رہے ہیں۔
نظام آباد لوک سبھا حلقہ میں ایک انتخابی ریلی سے خطاب کرتے ہوئے ریونت ریڈی نے کہا کہ مرکزی وزیر داخلہ کی شکایت کی بنیاد پر دہلی میں ان کے خلاف معاملہ درج کیا گیا ہے۔ وہ کہتے ہیں کہ ’’میں نے بی جے پی سے سوال کیا۔ جب میں نے ایسا کیا تو وزیر اعظم نریندر مودی اور وزیر داخلہ امت شاہ نے بدلے والا رویہ اختیار کر لیا اور میرے خلاف دہلی میں معاملہ درج کرا دیا۔‘‘
دراصل تلنگانہ کانگریس صدر ریونت ریڈی سوشل میڈیا پر پوسٹ کی گئی مرکزی وزیر داخلہ امت شاہ کی ’فرضی‘ ویڈیو سے متعلق یکم مئی کو جانچ میں شامل ہونے کے لیے دہلی پولیس کے ذریعہ جاری سمن کا تذکرہ کر رہے تھے۔ انھوں نے لوک سبھا انتخاب کو ’تلنگانہ کے وقار‘ اور ’گجرات کی بالادستی‘ کے درمیان مقابلہ قرار دیا اور کہا کہ وہ ڈٹ کر اپنے مخالفین کا مقابلہ کریں گے۔
ریونت ریڈی نے منگل کے روز تلنگانہ میں پی ایم مودی کی انتخابی تشہیر کی طرف اشارہ کرتے ہوئے کہا کہ وہ وزیر اعظم کا احترام کرتے ہیں، لیکن مودی گجرات کے باشندہ کی شکل میں تلنگانہ میں آئے اور ہمیں گالی دی۔ انھوں نے اپنی تقریر میں اسٹیل پلانٹ، ریل کوچ کارخانہ اور آندھرا پردیش ریاست تشکیل نو ایکٹ 2014 میں تلنگانہ کو دی گئی یقین دہانیوں اور ریاستی حکومت کے ذریعہ مرکز سے کی گئی گزارشات کے بارے میں بات نہیں کی۔
ریونت ریڈی کا کہنا ہے کہ مودی اس وقت جھوٹ بول رہے تھے جب انھوں نے کہا کہ ان کی پارٹی نے آئین کو بدلنے کے لیے کوئی سازش تیار نہیں کی۔ اپنے خلاف درج معاملے پر رد عمل ظاہر کرتے ہوئے ریڈی نے کہا کہ ’’آپ (مودی) میری ریاست میں آ کر وزیر اعلیٰ کو دھمکاتے ہیں، لیکن تلنگانہ کے لوگ اتنا بھی معصوم نہیں ہیں... وہ ڈریں گے نہیں۔‘‘
اس درمیان وزیر اعلیٰ کے اس تبصرہ پر کہ بی جے پی ریزرویشن ختم کر دے گی، بی جے پی کی ریاستی یونٹ کے صدر کشن ریڈی نے سخت اعتراض ظاہر کیا ہے۔ انھوں نے وزیر اعلیٰ سے اپنا بیان واپس لینے اور اخلاقیات کی بنیاد پر معافی مانگنے کا مطالبہ کیا۔