’’ پیگاسس اسپائی ویئر اسکینڈل‘‘ امریکہ کے واٹرگیٹ اسکنڈل سے بھی سنگین:ممتا بنرجی
861
M.U.H
23/07/2021
مغربی بنگال کی وزیر اعلی ممتا بنرجی نے دعوی کیا ہے کہ اس ہفتے سامنے آنے والا انکشاف ’’ پیگاسس اسپائی ویئر اسکینڈل‘‘سابق امریکی صدر نکسن کے دور میں سامنے آنے والا’’واٹر گیٹ اسکینڈل ‘‘ سے بھی بدترین ہے۔یہ ایمرجنسی سے بدترین ہے۔انہوں نے سیول سوسائٹی ، طلباء ، میڈیا سے وابستہ افراد سے ’’اسپائی ویئر ‘‘کے غلط استعمال کے خلاف آواز بلند کرنے کی اپیل کی۔
ممتا بنرجی نے کہا کہ جب پرشانت کشور کے فون کی نگرانی کی جارہی تھی تو اس کامطلب ہے کہ پرشانت کشور کے ساتھ میری گفتگو اور میٹنگوں کی بھی نگرانی کی جاتی تھی۔اس کا مطلب ہے کہ ہمیں اب مزید محتاط رہنا ہوگا۔ممتا بنرجی نے ریاستی سکریٹریٹ میں پریس کانفرنس میں کہا کہ پیگاسس واٹر گیٹ اسکینڈل سے بھی بدتر ہے ، یہ ایک بہت بڑی ہنگامی صورتحال ہے۔’’واٹر گیٹ اسکینڈل میں ابتدائی طور پر واشنگٹن میں ڈیموکریٹک پارٹی کے ہیڈ کوارٹر کی نگرانی کی جاتی تھی مگر بعد میں اس کا دائرہ کار میں وسعت آگئی تھی۔
ممتا بنرجی نےکہا کہ بی جے پی کے نظریاتی سرپرست آر ایس ایس کی بھی جاسوسی کی جارہی تھی۔انہوں نے کہا کہ بی جے پی کی قیادت کو اپنے ہی افسروں اور وزراء پر بھی اعتماد نہیں کرتی ہے ۔انہوں نے مزید کہا کہ انہوں نے سنا ہے کہ آر ایس ایس کے متعدد افراد کے فون بھی ٹیپ کئے گئےہیں ۔
ایک اسرائیلی کمپنی کے تیار کردہ پیگاسس ا سپائی ویئر کو مبینہ طور پر سیکڑوں افراد کے موبائل فون کوٹیپ کرنے کےلئے استعمال کیا گیا تھا۔جس میں صحافی ، حکمران جماعت اور حزب اختلاف دونوں کے لیڈران کے علاوہ بیوروکریٹس شامل ہیں ۔ممتا بنرجی نے کہا کہ ان کے دفتر میں پی کے (پرشانت کشور)کے ساتھ ہونے والی میٹنگ کی تفصیلات بھی ان لوگوں کو معلوم تھیں۔وزیر اعلی نے کہا کہ اگر کسی شخص کا فون نگرانی میں ہے تو ا س کا مطلب ہے کہ جو شخص ان سے بات کرے گا وہ بھی نگرانی میں ہیں ۔
ممتا بنرجی نے وزیر اعظم کی سخت تنقید کرتے ہوئے کہا کہ وہ میڈیا کو ڈرانے کی کوشش کر رہے ہیں ، اور عدلیہ پر قبضہ کرنے کی کوشش کر رہے ہیں۔"اپنے فون کے اسپیکر پر لیوپلاسٹ چسپاں کرتے ہوئے انہوں نے کہا کہ "یہ ایک علامتی احتجاج ہے۔انہوں نے کہا کہ اس کے خلاف سیول سوسائٹی، طلبا اور تمام افراد کو اس کے خلاف متحد ہونا چاہیے۔